لاہور+ مانٹریال (سپورٹس رپورٹر+ نوائے وقت رپورٹ) پاکستان کے سعدی عباس نے کامن ویلتھ کراٹے چیمپئن شپ میں گولڈ میڈل جیت لیا۔ انہوں نے کراٹے چیمپئن شپ کی 67 ویں کے جی کلاس میں گولڈ میڈل حاصل کیا۔ سعدی عباس نے فائنل میں کینیڈا کے مورس کو شکست دی۔ نجی ٹی وی سے گفتگو کرتے ہوئے سعدی عباس نے کہاکہ دنیا میں وطن کا نام روشن کرنے کیلئے محنت جاری رکھوں گا۔ دو مرتبہ کامن ویلتھ اور ایک بار ایشین چیمپئن بنا لیکن کسی نے پوچھنا تک گوارا نہیں کیا۔ فیڈریشن کو حکومت نے فنڈز نہیں دئیے، مانٹریال اپنے خرچ پر گیا۔ صدر پاکستان کراٹے فیڈریشن نے سعدی عباس کو مبارکباد دیتے ہوئے کہا ہے کہ ان کے اعزاز میں جلد تقریب کا انعقاد کیا جائیگا۔