بارباڈوس (اے پی پی) تین ملکی ویمنز ٹی 20 سیریز، ویسٹ انڈیز نے انگلینڈ کو 11 رنز سے شکست دے دی۔ ویسٹ انڈیز ویمن نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 140 رنز بنائے۔ سٹیفنی ٹیلر 40 رنز کے ساتھ نمایاں رہیں۔ انگلینڈ ویمن کی طرف سے ڈینیلا ہیزل نے تین اور جینی گن نے دو وکٹیں حاصل کیں۔ انگلینڈ کی ٹیم مطلوبہ ہدف حاصل کرنے میں ناکام رہی اور مقررہ اوورز میں 8 وکٹوں کے نقصان پر 129 رنز سکور کر سکی۔ کپتان شارلٹ ایڈورڈز 39 اور لارن ونفیلڈ 36 رنز کے ساتھ نمایاں رہیں۔ ویسٹ انڈیز ویمن کی جانب سے شکوانہ کوئنٹی نے تباہ کن باﺅلنگ کی اور 16 رنز کے عوض 5 کھلاڑیوں کو آﺅٹ کیا، انہیں میچ کی بہترین کھلاڑی قرار دیا گیا۔