لاہور (خصوصی رپورٹر) پاکستان پیپلز پارٹی کی سابق شریک چیئرپرسن و سابق سینئر وفاقی وزیر بیگم نصرت بھٹو کی دوسری برسی آج بدھ 23 ستمبر کو منائی جائے گی۔ بیگم نصرت بھٹو کی برسی کی مرکزی تقریب بلاول ہاﺅس کراچی میں ہو گی جبکہ لاہور میں پیپلز پارٹی شعبہ خواتین کی صدر بیگم بیلم حسنین کی رہائش گاہ پر بیگم نصرت بھٹو مرحومہ کے ایصال ثواب کے لئے قرآن خوانی ہو گی۔ برسی کے موقع پر پاکستان پیپلز پارٹی کے سرپرست اعلی بلاول بھٹو زرداری نے اپنے جاری کردہ بیان میں کہا ہے کہ آمریت کے خلاف دلیری سے لڑنے پر عوام نے مرحومہ بیگم نصرت بھٹو کو ”مادر جمہوریت“ قرار دیا۔ بیگم نصرت بھٹو نے قوم کی جدوجہد جمہوریت اور عوام کے حقوق کی بحالی کی خاطر اپنے شوہر شہید ذوالفقار علی بھٹو، دو بیٹے شہید مرتضیٰ بھٹو، شہید شاہنواز بھٹو اور بیٹی شہید بے نظیر بھٹو کو قربان کردیا۔ انہوں نے کہا کہ پارٹی بھٹو خاندان کے نقش قدم پر چلتے ہوئے جمہوریت کی مضبوطی کیلئے جدوجہد جاری رکھے گی تاکہ شہریوں کے حقوق محفوظ ہوں اور ان کو یکساں مواقع میسر ہوں۔