لاہور (کامرس رپورٹر) قائداعظم ٹرافی کرکٹ ٹورنامنٹ میں کراچی وائٹس نے لاہور شالیمار کو ایک اننگز اور 20 رنز سے شکست دیدی۔ اس سے قبل لاہور راوی کو بھی سیالکوٹ کے خلاف اننگز کی شکست کا سامنا کرنا پڑا تھا جس سے ٹیموں کے انتخاب میں سفارشی کھلاڑیوں کی شمولیت کا پول کھل گیا۔ قذافی سٹیڈیم میں کھیلے جا رہے میچ کے چوتھے روز لاہور شالیمار کی ٹیم فالوآن کے بعد دوسری اننگز میں بھی ریت کی دیوار ثابت ہوئی اور بیٹنگ وکٹ پر 52.4 اوورز میں 140 رنز بنا کر آﺅٹ ہوگئی۔ وقاص سلیم نے 32 اور عمر صدیق نے25 رنزبنائے۔ فہیم احمد نے چار اور بابر رحمان نے تین وکٹیں حاصل کیں۔ ایک اور میچ میں راولپنڈی نے بہاولپور کو ایک اننگز اور 130 رنز کے بڑے مارجن سے شکست دی۔ بہاولپور کی ٹیم فالو آن کے بعد دوسری اننگز میں 255 رنز بناسکی۔ عبدالباسط نے 114 اور ریحان رفیق نے 22 رنز بنائے۔