قصور (نامہ نگار)  ایک مکان کی چھت پر پڑے سکول بیگ سے دو دیسی ساخت کے بم برآمد کر لئے گئے۔ فیصل کالونی کی رہائشی شمائلہ بی بی نامی کسی عورت  نے ایمرجنسی 15پر کال کی کہ انکے ہمسائے رضوان کی چھت پر ایک سکول بیگ پڑا ہے جس میں مبینہ بارود ہوسکتا ہے جو کسی وقت پھٹ جانے سے جانی نقصان ہو سکتا ہے جس پر مقامی پولیس اور بم ڈسپوزل کا عملہ موقع پر پہنچ گیا جنہوں نے بیگ کو قبضہ میں لیکر اس میں پڑے بارود کو ناکارہ بنا دیا۔ پولیس ذرائع کے مطابق بیگ میں بارود نہیں دو دیسی ساخت کے بم تھے۔ پولیس نے نامعلوم افراد کیخلاف مقدمہ درج کرکے  تفتیش شروع کر دی ہے۔ یہاں یہ امر قابل ذکر ہے کہ جن کے گھر کی چھت سے خود ساختہ بم بر آمد ہوئے ہیں انکی بیٹی کی چند روز بعد شادی ہے۔ پولیس کی ابتدائی تفتیش کے مطابق بظاہر گھر والوں کے ان بموں سے کائی تعلق نظر نہیں آ رہا البتہ ایسا لگ رہا ہے کہ جیسے گھر والوں کو خوفزدہ یا انکو پھنسانے کیلئے بم وہاں رکھے گئے ہوں۔ پولیس کو اطلاع دینے والی عورت کا موبائل فون تاحال بند جا رہا ہے۔ پولیس مصروف تفتیش ہے۔