لاہور(کامرس رپورٹر)ایشین ہاکی چیمپئنز ٹرافی میں پاکستان نے اپنے پہلے میچ میں اومان کو 8-0 سے شکست دے کر ایونٹ کا فاتحانہ آغاز کردیا ۔جاپان کے شہر کاکا میگارا میں جاری ایشین ہاکی چیمپئنز ٹرافی کے اولین میچ میں دفاعی چیمپئن پاکستان کے کھلاڑی کمزور حریف اومان کے خلاف میدان میں اترے اور بھرپور کھیل پیش کرتے ہوئے مخالف ٹیم پر لگاتار حملے جاری رکھے اور نتیجہ صفر کے مقابلے میں 8 گول سے پاکستان کی فتح کی صورت میں سامنے آیا۔ پاکستان کی جانب سے محمد عمران نے 3، دلبر حسین اورسلمان نے2،2 جبکہ محمد توثیق نے ایک گول کیا۔فاتح ٹیم کا تین نومبر کو چین سے جوڑ پڑے گا۔روایتی حریف پاکستان اور بھارت کے درمیان مقابلہ سات نومبر کو شیڈول ہے، ایشین ہاکی چیمپئنز ٹرافی کا فیصلہ کن معرکہ دس نومبر کو ہو گا۔واضح رہے کہ پاکستان گزشتہ برس ایشین ہاکی چیمپئنز ٹرافی کا فاتح تھا اور اس بار وہ اپنے اعزاز کا دفاع کررہا ہے۔