اسلام آباد (آن لائن) امیر جماعت اسلامی منور حسین نے متحدہ قومی موومنٹ کے سربراہ الطاف حسین کے بیان پر ردعمل دیتے ہوئے کہا ہے کہ الطاف حسین قرآن مجید کا مطالعہ کریں اور ان کو شہید کے معنی کا مطلب واضح ہو جائے گا۔ نجی ٹی وی سے گفتگو کرتے ہوئے انہوں نے کہا کہ ایم کیو ایم کے قائد لندن میں بیٹھ کر بیان داغ دیتے ہیں اور لندن میں بیٹھ کر ہی ایسی باتیں کی جاتی ہیں۔ انہوں نے کہا کہ حکیم اﷲ محسود نے جہاد کیا تھا اور افغانستان کے اندر اسلام دشمنوں کے خلاف لڑتا رہا اور شہید ہوا۔ الطاف حسین اسلامی تعلیمات کا مطالعہ کریں اور اسلام کے متعلق صحیح گفتگو کریں۔ انہوں نے کہا کہ حکیم اﷲ محسود کے خلاف الطاف حسین نے پہلے تبصرہ کیا ہے اور کسی سیاستدان نے نہیں کیا۔