گجرات ( نامہ نگار ) موٹر سائیکل سواروں کی فائرنگ سے حساس ادارے کا ڈرائیور جاں بحق جبکہ کرنل  زخمی ہو گیا۔ تفصیلات کے مطابق تھانہ کنجاہ کے گائوں کوٹ موجدین میں حساس ادارے کے کرنل زاہد اپنے ڈرائیور مضان کے ہمراہ گائوں میں بنائے گئے حساس ادارے کے فارم ہائوس پر جارہے تھے کہ پہلے سے گھات لگائے ملزمان نے فائرنگ کھول دی جس کے نتیجہ میں فرنٹ سیٹ پر بیٹھے کرنل زاہد زخمی ہو گئے اور انکا ڈرائیور رمضان دم توڑ گیا۔ زخمی کرنل کو حساس ادارے کے اہلکاروں نے طبی امداد کیلئے کھاریاں سی ایم ایچ منتقل کر دیا ۔ واقعہ کی اطلاع ملتے ہی ڈی پی او گجرات علی ناصر رضوی پولیس کی بھاری نفری کے ہمراہ موقع پر پہنچ گئے جبکہ جائے وقوعہ اور اسکے اردگرد مقامی لوگوں کے سوا دوسرے لوگوں کو جانے سے روکدیا گیا۔ واقعہ کے بعد ضلع بھر میں پولیس نفری کو الرٹ رہنے کی ہدایات کر دی گئی۔