کراچی (کرائم رپورٹر) کراچی میں جمعہ کو فائرنگ کے واقعات میں کمسن  بچے سمیت  5 افراد ہلاک اور  عورت سمیت  چار افراد زخمی  ہو گئے۔ گارڈن کے علاقے عثمان آباد میں  موٹر سائیکل سوار  افراد نے 35 سالہ حسین کچھی کو گولیاں مار کر ہلاک کردیا۔ نمک کے کارخانے میں کام کرتا تھا۔ ادھر نیپئر کے علاقے گھاس منڈی میں مسلح افراد کی فائرنگ سے ایک عورت 33 سالہ  ثنا زوجہ فرقان زخمی ہو گئی جبکہ سائٹ میں غنی چورنگی کے نزدیک فائرنگ سے 20 سالہ محمد اکرم ولد ابراہیم زخمی ہوگیا۔ مزید برآں جمعہ کی شام لیاری میں کوئلہ گودام کے علاقے میں نامعلوم افراد کی فائرنگ سے ایک بچہ 7 سالہ یاسین  ہلاک ہو گیا۔ اس کے علاوہ پیر آباد کے علاقے قصبہ کالونی میں میٹرو سینما کے قریب جمعہ کی شب  مسلح افراد نے ایک شخض 35 سالہ ریاض ولد بشیر خان کو فائرنگ کر کے ہلاک کر دیا جبکہ بھینس کالونی کے علاقے یوسف گوٹھ میں مسلح افراد نے فائرنگ کر کے ایک 30 سالہ شخص کو موت کی گھاٹ اتار دیا۔ دریں اثناء شہر کے مختلف علاقوں میں رینجرز کا ٹارگٹڈ آپریشن جاری رہا۔ جمعہ کو 43 جرائم پیشہ افراد کو گرفتار کیا گیا۔ شاہ فیصل کالونی، خداداد کالونی سمیت عزیز آباد میں بھی ٹارگٹڈ آپریشن اور سنیپ چیکنگ بھی کی گئی۔رات گئے قصبہ  کالونی میں  نامعلوم افراد  کی فائرنگ سے ایک شخص  جاں بحق ہوگیا  جس کی فوری طور پر شناخت نہ ہوسکی۔