فیروزوالا + پتوکی (نامہ نگاران) فیروزوالا، پتوکی میں ٹریفک حادثات کے دوران خاتون سمیت 5 افراد جاںبحق، 2 زخمی ہو گئے۔ تفصیلات کے مطابق فیروزوالا میں لاہور روڈ پر کوٹ نورشاہ کے قریب ٹریکٹر ٹرالی اور موٹر سائیکل کے درمیان تصادم میں موٹر سائیکل سوار اور ٹریکٹر ڈرائیور دونوں جاںبحق ہو گئے۔ ایک مزدور زخمی ہو گیا۔ نظام پور کا 40 سالہ بشیر احمد موٹر سائیکل پر کوٹ نورشاہ جا رہا تھا جب موڑ کاٹنے لگا تو شرقپور سے آنے والی ٹریکٹر ٹرالی لوڈ شدہ نے اسے ٹکر مار دی جس سے موٹر سائیکل سوار ہلاک جبکہ ٹریکٹر الٹنے سے ڈرائیور جاوید نامی بھی ہلاک ہو گیا۔ پولیس فیکٹری ایریا نے دونوں نعشوں کو ضروری کارروائی کے بعد ورثا کے حوالے کر دیا۔ ادھر جی ٹی روڈ پر تیز رفتار مزدا ٹرک کی زد میں آ کر ایک خاتون ہلاک ہو گئی۔ شاہدرہ پولیس نے واقعہ کی رپورٹ درج کر لی۔ حادثہ کے باعث شاہدرہ میں ٹریفک جام ہو کر رہ گئی۔ علاوہ ازیں پتوکی میں موٹر سائیکل اور گدھا گاڑی میں تصادم سے دو افراد جاںبحق ایک زخمی ہو گیا۔ چونگی امرسدھو کے محمد عباس، بیٹا محمد احمد اور غلام رسول موٹر سائیکل پر سوار لاہور سے پتوکی کی طرف آرہے تھے ملتان روڈ آرائیں ماڈل فارم کے قریب گدھا گاڑی سے ٹکرا گئے، غلام رسول موقع پر ہی جاںبحق ہو گیا اور محمد عباس، بیٹا محمد احمد شدید زخمی ہو گئے جنہیں فوری طور پر تحصیل ہیڈ کوارٹر ہسپتال لایا گیا جہاں پر ڈاکٹر موقع پر موجود نہ تھا۔ زخمی محمد احمد نے بتایا میرا والد محمد عباس ڈاکٹر کی فوری طبی امداد نہ ملنے پر تڑپ کر جاںبحق ہو گیا جبکہ فون کرنے کے باوجود ہسپتال کی طرف سے ایمبولینس بھی مہیا نہ کی گئی۔ جماعت الدعوۃ کی ایمبولینس نے فوری طور پر ان کو تحصیل ہیڈ کوارٹر ہسپتال پہنچایا۔