نئی دہلی(آن لائن) بھارت نے پاکستان  کو 400 ملین  کیوبک  فٹ یومیہ گیس  برآمد کرنے کی خواہش ظاہر کی ہے  تاہم پاکستان نے بھارت  سے  کہا ہے کہ وہ گیس کی زائد قیمت  پر نظر ثانی کرے ۔ ایک بھارتی اخبار کے مطابق  بھارت کی وزارت پٹرولیم نے کہا ہے کہ  پاکستان  110 کلو میٹر  طویل گیس پائپ لائن   کے ذریعے بھارت سے گیس  برآمد کرنے کے لیے   تیار ہے تاہم اس نے بھارت سے گیس  کی قیمت پر نظر ثانی  کرنے کا مطالبہ کیا ہے  تاہم لائن  آف کنٹرول  پر کشیدگی سے  یہ منصوبہ پس پشت   چلا گیا ہے  ۔ بھارتی وزارت پٹرولیم کے ایک  سینئر افسر کے مطابق  دونوں فریقوں کے درمیان گیس کی قیمت  سمیت گیس درآمد  کے دیگر پہلوئوں  پر مذاکرات جاری ہیں ۔ بھارتی اخبار کے مطابق بھارت  میں درآمد  کی  جانے والی  مائع قدرتی  گیس کی قیمت  13سے 14ڈالر  فی ملین   برٹش تھرمل  یونٹ ہے  اور درآمدی ڈیوٹی  ، مقامی ٹیکس اور پائپ لائن  کی قیمت ملا کر پاکستان کو 21 ڈالر  فی   ایم جی ٹی یو کی قیمت  پر گیس فروخت کی جائے گی  جبکہ مائع قدرتی گیس  کو گیس کی شکل  بھی بھارت ہی دے گا  کیونکہ پاکستان کے پاس یہ نظام  موجود نہیں ہے ۔ اب تک بھارت اور پاکستان کے درمیان  اس معاملے پر مذاکرات  کے پانچ دور ہوئے ہیں جن میں  اس منصوبے کے قابل عمل ہونے پر اتفاق کیا گیا ہے ۔