لاہور ( سپورٹس رپورٹر )پی ایچ ایف کے چیف الیکشن کمشنر ارشد انصاری نے پنجاب ویمن ہاکی ایسوسی ایشن کے شیڈول کا اعلان کر دیا جس کے مطابق ایسوسی ایشن سے ملحقہ ساتوں اضلاع میں اٹھارہ نومبربروز پیر کو انتخابات ہوں گے ۔ شیڈول کے مطابق لاہور ریجن کے انتخابات کا انعقاد نیشنل ہاکی سٹیڈیم گرائو نڈ ٹو میں10بجے صبح ہوگا  خواتین کے الیکشن کے لئے انٹر نیشنل ہا کی پلیئر خواجہ محمد اویس کو الیکشن کوآرڈینیٹر مقر ر کیا گیا ہے جبکہ اسی روز مر دوں کے الیکشن کے لئے انٹر نیشنل ہا کی پلیئر قا سم خا ن کہ الیکشن کوآر ڈینیٹر لگا یا گیا ہے ۔ گوجرانوالہ کے انتخابات ماڈل ٹائون کالج میں ہوں گے جہاں عفت نیازی اور زبیدہ احسان کو کوآرڈینیٹر مقرر کیا گیا ہے۔ فیصل آباد کے انتخابات گورنمنٹ کالج فار ویمن مدینہ ٹائون میںکوآرڈینیٹر تسنیم رضوی بہاولپور کے انتخابات بہاولپور سٹیڈیم میں کوآرڈینیٹر ریحانہ پروین راولپنڈی کے انتخابات گورنمنٹ کالج فار ویمن مری روڈ میںکوآرڈینیٹر نجمہ اشرف ڈی جی خان کے انتخابات گورنمنٹ ڈگری کالج برائے خواتین میں کوآرڈینیٹر راحت اقبال جبکہ سرگودھا کے انتخابات سپورٹس سٹیڈیم سرگودھا میں کوآرڈینیٹر مسرت شاہین کی زیر نگرانی ہوں گے۔ تمام ریجنز میں انتخابی عمل صبح دس بجے شروع ہوگا۔ چیف الیکشن کمشنر نے انتخابات کے شفاف انعقاد کے لئے تمام ریجنز میں ایک ایک مرد کوآرڈینیٹر کا بھی تقرر کیا ہے جو سکروٹنی اور انتخابی عمل میں معاونت کریں گے۔ گوجرانوالہ میں انصر محمود فیصل آباد میں طاہر احمد راولپنڈی میں ظہیر احمد ڈی جی خان میں قاضی مسعود الرئوف بہاولپور میں جاوید اختر اور سرگودھا میں مشتاق احمد کو کوآرڈینیٹر مقرر کیا گیا ہے۔ انہوں نے کہاکہ تمام انتخابات پاکستان ہاکی فیڈریشن کے آئین میں وضع کردہ قوانین اور طریقہ کار کے مطابق ہوں گے اس حوالہ سے کسی چیز پر سمجھوتہ نہیں کیا جائے گا۔ ان کا کہنا تھا کہ لاہور میں مردو خواتین کے انتخابی عمل کے دوران تین تین سینئر صحافیوں کا بطور آبزرور بھی تقرر کیا جائے گا۔  ارشد انصاری نے بتایا کہ قبل ازیں انتخابات کا انعقاد سولہ نومبر کو ہونا تھا لیکن کلبوں کی انتظامیہ نے عاشورہ کے باعث تاریخ میں توسیع کرنے کی درخواست کی تھی لہٰذا انتخابات اٹھارہ نومبر بروز پیر متذکرہ بالا شیڈول اور پی ایچ ایف کے قوانین کے مطابق کرائے جائیں گے۔ انہوں نے کہا کہ لاہورڈسٹرکٹ میں انتخابات موقع پر پاکستان ہاکی فیڈریشن کے صدر قاسم ضیاء کو بھی خصوصی طور پر مدعو کیا گیا ہے۔