ممبئی (اے پی پی) کرکٹ کنٹرول بور آف انڈیا (بی سی سی آئی) نے سال 2013-14ء کیلئے 25 کھلاڑیوں کو سینٹرل کنٹریکٹ دینے کا اعلان کر دیا۔ جارح مزاج بلے باز وریندر سہواگ، فاسٹ بائولر ظہیر خان اور مایہ ناز سپنر ہربجھن سنگھ فہرست سے خارج ہو گئے۔ یووراج سنگھ اور گوتم گھمبیر تنزلی کے بعد اے کیٹگری سے بی میں آ گئے جبکہ سریش رائنا کی حیران کن طور پر بی سے اے کیٹگری میں آمد ہوئی۔ بی سی سی آئی کی طرف سے جاری کردہ ریلیز کے مطابق اے کیٹگری میں پانچ کھلاڑی شامل ہیں جن میں سچن ٹنڈولکر، مہندرا سنگھ دھونی، ویرات کوہلی، سریش رائنا اور روی چندرن ایشون شامل ہیں اور ان کھلاڑیوں کو ماہانہ 1 کروڑ روپے ملے گا، بی کیٹگری میں شامل کھلاڑیوں میں گوتم گھمبیر، یووراج سنگھ، پراگیان اوجھا، اشانت شرما، مرلی وجے، شیکھر دھاون، اومیش یاداو، چیتشورپوجارا، روندرا جدیجہ، بھنشور کمار اور روہت شرما شامل ہیں، جنہیں 50 لاکھ ماہانہ جبکہ سی کیٹگری میں دنیش کارتھک، امیت مشرا، وریدیمن سہا، اجنکیا راہانے، امباتی ریودو، ونے کمار، محمد شامی، جے دیو اندکت اور موہت شرما شامل ہیں اور انہیں 25 لاکھ ماہانہ حاصل ہوں گے۔ کھلاڑیوں کا یہ کنٹریکٹ رواں سال یکم اکتوبر سے 30 ستمبر 2014ء تک رہے گا۔