ٹوبہ ٹیک سنگھ(نامہ نگار) جھنگ روڈ پر تین موٹر سائیکل سوار افراد نے اندھا دھند فائرنگ کرکے بشارت عرف بھولا بھالا پہلوان کو قتل کردیا۔ بیان کیا جاتا ہے نواحی گائوں 330/ج ب (سیووال) کاشجر شاہ کے بشارت عرف بھولا بھالا پہلوان شہر سے واپس گائوں جارہے تھے کہ راستہ میں موٹر سائیکل 125 پرسوار تین مسلح افراد نے فائرنگ شروع کردی جس سے بشارت شدید زخمی ہوگیا جسے طبی امداد کیلئے ڈسٹرکٹ ہیڈ کوارٹر ہسپتال پہنچایا گیا لیکن تشویشناک حالت کے پیش نظر ان کو الائیڈ ہسپتال فیصل آباد ریفر کردیا گیا مگر وہ زخموں کی تاب نہ لاتے ہوئے دم توڑ گئے۔یاد رہے بشارت عرف بھولا بھالا پہلوان کبڈی کے کئی انٹرنیشنل میچ جیت چکے ہیں۔ نجی ٹی وی کے مطابق بھولا بھالا پہلوان بھارت اور دیگر ممالک میں پہلوانی کے مقابلے جیت چکے ہیں۔