لاہور( این این آئی) ’’ بھٹو شہید بینظیر ورکرز موومنٹ ‘‘ کی مرکزی کوارڈی نیٹر ناہید خان نے کہا ہے کہ پارٹی کو آسمان سے زمین پر لانے والے آج بھی اپنی اصلاح کرنے کو تیار نہیں ، بنکرز میں بیٹھ کر اور سوشل میڈیا پر بیان بازی سے پارٹی چل سکتی ہے او رنہ ہی عوام کی کوئی خدمت ہو سکتی ہے، پارٹی کو منظم کرنے کیلئے علم سنبھالا ہے اور اس کے لئے کچھ وقت درکارہے ۔ ایک انٹر ویو میں ناہید خان نے کہا کہ ہمارا مشن بھٹو شہید اور بی بی شہید کی پیپلز پارٹی کو دوبارہ منظم کرنا ہے جسکے لئے ہر ممکنہ اقدامات اٹھا رہے ہیں ۔ 30 نومبر کو پیپلز پارٹی کا 47واں یوم تاسیس جوش و خروش سے منایا جائے گا اور اس روز پارٹی کو دوبارہ منظم کرنے کے عزم کا عہد کریں گے۔ پارٹی کو آسمان سے زمین پر لانے کے ذمہ دار آج بھی اپنی اصلاح کو تیار نہیں اور بڑے بڑے دعوے کئے جارہے ہیں۔ پارٹی کو دوبارہ منظم کرنے کا بیڑہ اٹھایا ہے اور اس میں ضرور کامیاب ہوں گے۔