کراچی (سپورٹس رپورٹر) محمد آصف نے مسلسل تیسری مرتبہ لینگ نیز رینکنگ سنوکر کپ جیت لیا۔ فائنل میں مد مقابل محمد بلال کو یکطرفہ طورپر چار کے مقابلے میں آٹھ فریم سے شکست دیکر اپنے ٹائٹل کا کامیاب دفاع کرلیا، محمد آصف نے فائنل کے دوران سنچری( 116) پوائنٹس کا بریک بھی کھیلا ۔ کراچی کے مقامی ہوٹل میں منعقد ہونیوالے ٹورنامنٹ کے بیسٹ آف 15فریم پر مشتمل فائنل میں محمد بلال نے عالمی چیمپئن کو پہلے ہی فریم میں96-37 پوائنٹس کے فرق سے شکست دیکر اپنی موجودگی کا احساس دلادیا تاہم محمد آصف نے پہلے فریم میں شکست کے بعد کھیل پر مکمل کنٹرول حاصل کیا اور اگلے سات فریم میں محمد بلال کو باآسانی( 71-34، 71-29، 120-0، 71-50، 122-10، 72-22 اور81-43 ) پوائنٹس سے شکست دیکر مقابلہ7-1 سے اپنے حق میں کرلیا۔انہوں نے چھٹے فریم میں116پوائنٹس کا بریک بھی کھیلا۔ اسکے بعد محمد بلال نے میچ میں واپس آنے کی بھرپور کوشش کی مگر کامیاب نہ ہوسکے۔ نویں فریم میں محمدبلال نے آصف کو 5-84، دسویں فریم میں 13-104 اور گیارہویں فریم میں26-67 پوائنٹس سے شکست دیکر مقابلہ7-4 کردیا ۔اپنے خلاف خطرہ محسوس کرتے ہوئے محمد آصف نے مقابلہ12ویں فریم میں نپٹادیا۔ انہوں نے98-0 سے فریم میں کامیابی حاصل کرکے چوتھا لینگنیز رینکنگ سنوکرکپ بھی جیت لیا۔ کمشنر کراچی شعیب احمد صدیقی نے کھلاڑیوں میں انعامات تقسیم کئے۔ تقریب تقسیم انعامات میں پاکستان بلیئرڈ اینڈ سنوکر ایسوسی ایشن کے صدر عالمگیر شیخ اور دیگر عہدیداران بھی موجود تھے۔