گوجرانوالہ (نمائندہ خصوصی) فلائی اوور کے قریب ڈور پھرنے سے موٹر سائیکل سوار شدید زخمی ہوگیا۔ معلوم ہوا ہے راہوالی کا رہائشی توقیر بدر کسی کام کے سلسلے میں کنگنی والا سے واپس گھر جا رہا تھا کہ دستگیر پٹرول پمپ کے قریب فلائی اوور پر ڈور پھرنے سے شدید زخمی ہوگیا جس کو فوری طور پر سول ہسپتال لایا گیا۔ ادھر توقیر بدر کے لواحقین نے میڈیا کے سامنے شدید احتجاج کیا ان کا کہنا تھا خادم اعلیٰ پنجاب نے پتنگ بازی پر پابندی عائد کر رکھی ہے مگر اس کے باوجود پچھلے سات دنوں کے دوران تھانہ سبزی منڈی کی حدود میں یہ تیسرا واقعہ ہے۔ خادم اعلیٰ پنجاب سے اپیل کی ہے تھانہ سبزی منڈی کے علاقہ میں گڈی اور ڈور کی فروخت سرعام ہورہی ہے جبکہ ایس ایچ او سبزی منڈی نے چپ سادھ رکھی ہے۔