لاہور، قصور :خاتون اور تین سالہ بچے سمیت 3افراد ٹرین کی زد میں آکر جاں بحق
لاہور + قصور (نامہ نگار+ سٹاف رپورٹر+ نامہ نگار) کینٹ ریلوے سٹیشن پر 70سالہ بزرگ ٹرین کی زد میں آکر جاں بحق ہو گیا۔ معلوم ہوا ہے 70سالہ ایوب خان کینٹ کا مقامی رہائشی تھا اور ٹرین کی پٹڑی کراس کر رہا تھا کہ اچانک مال گاڑی کی زد میں آکر موقع پر ہی جاں بحق ہو گیا۔ پولیس نے اطلاع ملنے پر لاش کو قبضہ میں لیکر مردہ خانے بھجوا دی۔ دریں اثناء نصیرآباد کے علاقہ میں نامعلوم خاتون ٹرین کی زد میں آکر جاں بحق ہو گئی۔ بتایا جاتا ہے ریلوے لائن پھاٹک نامعلوم خاتون پٹڑی عبور کر رہی تھی کہ ٹرین کی زد میں آکر جاں بحق ہو گئی۔ پولیس کے مطابق خاتون کی شناخت نہیں ہو سکی ہے جس پر لاش پوسٹ مارٹم کیلئے مردہ خانے جمع کرا دی گئی ہے جبکہ متوفیہ حلیے سے بھکارن معلوم ہوتی ہے۔قصور سے نامہ نگار کے مطابق نواحی گائوں بھوئے اصل کے نزدیک ایک تین سالہ بچہ ٹرین تلے آکر ہلاک ہوگیا ۔ تفصیلا ت کے مطابق تین سالہ نور ابوبکر اپنے گھر کے پاس ریلوے لائن پر کھیل رہا تھا کہ کراچی ایکسپریس ٹرین نے اسے کچل دیا جس سے موقعہ پر ہلاک ہوگیا ۔
