راولپنڈی (سٹاف رپورٹر + نوائے وقت رپورٹ + ایجنسیاں) آرمی چیف جنرل راحیل شریف نے باضابطہ طور پر ذمہ داریاں سنبھال لیں، پہلے روز جی ایچ کیو میں مصروف دن گزارا۔ جنرل راحیل شریف عہدہ سنبھالنے کے بعد پہلی بار جنرل ہیڈ کوارٹر پہنچے تو چیف آف جنرل سٹاف لیفٹیننٹ جنرل اشفاق ندیم احمد، کور کمانڈر راولپنڈی، پرنسپل سٹاف آفیسرز اور اعلیٰ حکام نے ان کا استقبال کیا۔ آرمی چیف کو پاک فوج کے چاق و چوبند دستے نے سلامی پیش کی آرمی چیف نے گارڈ آف آنر کا بھی معائنہ کیا ۔ جنرل راحیل شریف نے شہداءکی یادگار پر پھول چڑھائے اور فاتحہ خوانی کی۔ جنرل راحیل شریف کی صدارت میں تعارفی اجلاس ہوا جس میں جی ایچ کیو کے افسروں اور سٹاف نے شرکت کی۔ آرمی چیف کو پیشہ وارانہ امور، امن و امان کی مجموعی صورت حال اور پاک فوج کے جاری آپریشنز سمیت ترقیاتی منصوبوں پر بریفنگ دی گئی۔ جنرل راحیل شریف سے چیف آف جنرل سٹاف لیفٹیننٹ جنرل اشفاق ندیم احمد نے ملاقات کی اور انہیں اپنے ادارے کی کارکردگی سے متعلق آگاہ کیا اور آر می چیف تعیناتی پر مبارکباد دی۔ پاک فوج کے پرنسپل سٹاف افسران نے بھی ان سے ملاقات کی۔ جنرل راحیل شریف سے لیفٹیننٹ جنرل (ر) ہارون اسلم نے بھی ملاقات کی۔ لیفٹیننٹ جنرل (ر) ہارون اسلم نے جنرل راحیل شریف کو آرمی چیف بننے پر مبارکباد دی اور فوج اور آرمی چیف کیلئے نیک خواہشات کا اظہار کیا۔