شاہ کوٹ، سرگودھا میں 2 خواتین فیصل آباد میں 2 لڑکیوں سے زیادتی
شاہ کوٹ + فیصل آباد + سرگودھا (نامہ نگاران + نمائندہ خصوصی) شاہ کوٹ اور سرگودھا میں 2 خواتین، فیصل آباد میں 2 لڑکیوں کو زیادتی کا نشانہ بنا دیا گیا۔ شاہ کوٹ نواحی گائوں بھولا چک میں اوباش شخص عبدالرسول نے اپنے دو ساتھیوں عدنان اور حنیف کی مدد سے گائوں کی خاتون عابدہ بی بی کو زبردستی زیادتی کا نشانہ بنا ڈالا۔ ملزم خاتون کے گھر زبردستی داخل ہو گیا اور اپنے دو ساتھیوں کی مدد سے اسے بے آبرو کر دیا۔ پولیس تھانہ صدر شاہ کوٹ نے ملزمان کے خلاف مقدمہ درج کر لیا ہے۔ فیصل آباد میں ٹھیکری والا کی رہائشی شبانہ کوثر نے مقدمہ درج کرواتے ہوئے موقف اختیار کیا ہے اس کی جواں سالہ بہن (ف) گھریلو کام میں مصروف تھی ملزمہ رفیہ وغیرہ اس کو بازار جانے کا بہانہ بنا کر اغوا کر کے نامعلوم مقام پر لے گئی جبکہ منصورآباد کے شفیق احمد کی جواں سالہ بیٹی(ذ) کو نامعلوم ملزمان زبردستی اغوا کر کے نامعلوم مقام پر لے گئے جہاں اسے مبینہ طور پر زیادتی کا نشانہ بنایا گیا۔ مدینہ ٹاؤن رسول پارک کے محمد رفیق نے مقدمہ درج کرواتے ہوئے موقف اختیار کیا ہے اس کی جواں سالہ بیٹی(ن) اکیلی گھریلو کام کاج میں مصروف تھی مسلح ملزمان اسلحہ کے زور پر اغوا کر کے نامعلوم مقام پر لے گئے جہاں اسے مبینہ طور پر زیادتی کا نشانہ بنایا گیا۔ علاوہ ازیں سرگودھا میں قصبہ پوہلہ کی عابدہ بی بی گھر میں اکیلی کام کاج میں مصروف تھی گائوں کے اوباش نوجوان عمر حیات نے اس کے ساتھ زیادتی کی۔
