لاہور، قصور میں 2، فیصل آباد 3 اور سرگودھا میں ایک خاتون سے زیادتی
لاہور + قصور + فیصل آباد + سرگودھا (نامہ نگاران + نمائندہ خصوصی) لاہور، قصور میں 2، فیصل آباد 3، سرگودھا میں ایک خاتون کو زیادتی کا نشانہ بنایا گیا، تفصیلات کے مطابق لاہور میں ایف سی کالج پل پرنامعلوم کار سوار جواں سالہ خاتون کو اغوا اور زیادتی کا نشانہ بنانے کے بعد شدید زخمی حالت میں پھینک کر فرار ہو گئے جسے طبی امداد کے لئے سروسز ہسپتال منتقل کردیاگیا ہے جہاں خاتون نے اپنے دوپٹے سے پھندا لے کر خودکشی کی کوشش کی جسے عملے نے ناکام بنا دیا۔ متاثرہ خاتون نے زار و قطار رونا شروع کردیا اور صدمے سے نیم بیہوش ہو گئی جس کے بعد ڈاکٹروں نے خاتون کو انتہائی نگہداشت وارڈ میں منتقل کر دیا ہے۔ پولیس کے مطابق شبہ ہے نامعلوم افراد نے خاتون کو اغوا کے بعد زیادتی کا نشانہ بنایا۔ نواحی گائوں مان میں (ش) گھر میں موجود تھی بوٹا تیلی اس کے گھر میں آیا اور کہا میری بیوی تمہیں بلا رہی ہے جس پر (ش) اس کے ساتھ بوٹا تیلی کے گھر میں چلی گئی جہاں پر پہلے سے موجود دو افراد پرویز وغیرہ نے گن پوائنٹ پر (ش) کو اجتماعی زیادتی کا نشانہ بنا ڈالا۔ فیصل آباد میں چک نمبر269 ر۔ب ڈجکوٹ کے عابد حسین نے مقدمہ درج کرواتے ہوئے موقف اختیار کیا ہے اس کی جواں سالہ ہمشیرہ (ش) گھریلو کام کاج میں مصروف تھی ملزم عارف حسین زبردستی مبینہ طور پر زیادتی کا نشانہ بنا کر موقع سے فرار ہو گیا جبکہ ماموں کانجن چک نمبر 508 گ۔ب کی (ف) ضروری کام کے سلسلہ میں بازار جا رہی تھی ملزمان عاطف وغیرہ اسے مبینہ طور پر زیادتی کا نشانہ بنایا گیا۔ ٹھیکری والا چک نمبر74ج۔ب کے ریاض الحق کی اہلیہ (الف) اکیلی گھریلو کام کاج میں مصروف تھی ملزمان امجد وغیرہ پانچ افراد زبردستی اسے اغوا کر کے نامعلوم مقام پر لے گئے جہاں اسے مبینہ طور پر زیادتی کا نشانہ بنایا گیا۔ ادھر سرگودھا میں شیخ جلیل سے پانچ افراد نے شادی شدہ خاتون کو اغوا کرکے اجتماعی زیادتی کا نشانہ بنا ڈالا، خاتون (ک) کے بھائی مظہر نے بتایا اسکی بہن کو بشیر، وارث اور عامر وغیرہ اغوا کرکے لے گئے اور زیادتی کا نشانہ بنایا۔
