میرپور (نمائندہ خصوصی) ڈائیوو پاکستان ایکسپریس بس سروس نے میرپور (آزادکشمیر) سے لاہور اور راولپنڈی کیلئے بس سروس کا باقاعدہ آغاز کر دیا ہے۔ صدر آزاد جموں و کشمیر سردار یعقوب احمد نے ایک پروقار تقریب میں اس بس سروس کا افتتاح کیا۔ اس موقع پر ڈائیوو پاکستان ایکسپریس بس سروس کے پریذیڈنٹ سٹی آئی پارک بھی موجود تھے۔ انہوں نے اس موقع پر حاضرین سے خطاب کرتے ہوئے کہا کہ ڈائیوو پاکستان ایکسپریس بس سروس کو یہ اعزاز حاصل ہے کہ اب اس کی سروس کا سلسلہ آزادکشمیر تک بھی پھیل چکا ہے۔ آزادکشمیر میں سیاحت کے فروغ کیلئے روڈ نیٹ ورک کی گروتھ کے ساتھ ساتھ اچھی بس سروس کا ہونا بھی نہایت ضروری ہے۔ ڈائیوو پاکستان ایکسپیرس بس سروس کے آغاز سے آزادکشمیر میں سیاحتی سرگرمیوں کو فروغ ملے گا۔ اس کے علاوہ میرپور شہر کو ڈائیوو پاکستان ایکسپریس بس سروس کے پورے پاکستان میں پھیلے وسیع نیٹ ورک تک رسائی بھی حاصل ہوگی۔