لندن (آن لائن+ اے این این) لندن میں اپالوتھیٹرکی بالکنی کی چھت کے ملبے سے 90 زخمیوں کو نکال لیا گیا۔ غیر ملکی خبر رساں ادارے کے مطابق لندن کے علاقے شافٹسبری میں واقع اپالو تھیٹر میں ڈرامہ پیش کیا جارہا تھا کہ رات تقریباً سوا آٹھ بجے داخلی بالکنی کا ایک حصہ دھماکے سے نیچے آگرا۔ حادثے کے وقت تھیٹر میں سات سو سے زائد افراد موجود تھے۔ بالکنی گرتے ہی ہر طرف دھول اور مٹی پھیل گئی اور افراتفری مچ گئی۔ لوگ جان بچانے کے لئے تھیٹر سے باہر کی طرف بھاگنے لگے۔ واقعے کے بعد پولیس اور ریسکیو ٹیمیں موقع پر پہنچ گئیں اور امدادی کارروائیاں شروع کردی گئیں۔ پانچ زخمیوں کی حالت تشویش ناک بتائی جاتی ہے۔ حکام کا کہنا ہے کہ واقعے سے پہلے علاقے میں شدید بارش ہوئی تھی تاہم حادثے کی وجوہات جاننے کے لئے تحقیقات جاری ہیں۔ حکام کے مطابق سرچ اور ریسکیو آپریشن مکمل کر لیا گیا ہے اور تھیٹر کو سیل کر دیا گیا ہے جس کے بعد عمارت کا معائنہ کیا جائے گا۔