لاہور(سپورٹس رپورٹر) گورنمنٹ ہائی سکول منہالا کلاں کا سالانہ سپورٹس ڈے گذشتہ روز منایا گیا ۔ سالانہ سپورٹس کے موقع پر کبڈی کا مقابلہ وقار الیون نے حامد نصیر الیون کو سخت مقابلے کے بعد شکست دیکر اپنے نام کیا۔ فٹبال ایونٹ میں عادل اور شہروز ایلون کے درمیان کھیلا جانے والا میچ ایک ایک گول سے برابر رہا۔ کرکٹ میں احمد فراز الیون نے عدیل الیون کو شکست سے دوچار کیا۔ اشفاق اور سعد علی پر مشتمل جوڑی نے تھری لیگ ریس اپنے نام کی۔ فہد اور عمیر دوسرے جبکہ رضوان اور مبشر تیسرے نمبر پر رہے۔ بوری ریس ایم آصف کے نام رہی۔ عدیل دوسرے اور قیصر تیسرے نمبر پر رہے۔ ہائی سیکشن کی بوری ریس میں امجد علی نے پہلی،انور شاکر نے دوسری اور فیضان نے تیسری پوزیشن حاصل کی۔ علی رضا نے سپون ریس میں پہلی، ایک اویس نے دوسری، ایم سیف نے تیسری پوزیشن حاصل کی۔ سلو سائیکل ریس کا ٹائٹل صداقت نے جیت لیا جبکہ خرم مراد دوسرے اور اسد فاروق تیسرے نمبر پر رہے۔ سالانہ سپورٹس ڈے کی اختتامی تقریب کے مہمان خصوصی میجر (ر) سعید اور عمران علی جٹ  نے کامیاب کھلاڑیوں میں انعامات تقسیم کیے۔  اس موقع پر سکول ہیڈ ماسٹر کنور عابد علی، حاجی رانا جاوید، چودھری عارف کے علاوہ بڑی تعداد میں بچے موجود تھے۔