اسلام آباد (سٹاف رپورٹر) بری فوج میں اعلیٰ سطح پر تبادلے کرتے ہوئے پیر کے روز چھ لیفٹیننٹ جنرلز کو نئی ذمہ داریاں سونپ دی گئی ہیں۔ نئے آرمی چیف جنرل راحیل شریف نے کمان سنبھالنے کے بعد پہلی بار بری فوج کے کمانڈ اور سٹاف عہدوں پر افسروں کا یہ ردوبدل کیا ہے۔ آئی ایس پی آر کے مطابق تبادلوں کے اس فیصلے کے تحت لیفٹیننٹ جنرل جاوید اقبال کو کور کمانڈر بہاولپور مقرر کیا گیا ہے۔ لیفٹیننٹ جنرل کے عہدہ پر ترقی پانے و الے عبید اللہ خان کو بری فوج کے ایٹمی ہتھیاروں سے لیس دستوں ’’آرمی سٹرٹیجک فورس کمانڈ‘‘ کا نیا سربراہ بنا دیا گیا ہے۔ لیفٹیننٹ جنرل ضمر الحسن جی ایچ کیو میں ایجوٹنٹ جنرل مقرر ہوئے ہیں اور لیفٹیننٹ جنرل محمد زاہد لطیف کو ایئر ڈیفنس کمانڈر کا سربراہ مقرر کیا گیا ہے۔ لیفٹیننٹ جنرل اکرام الحق آئی جی ٹریننگ ایولوایشن اور لیفٹیننٹ جنرل طارق جیلانی چیف آف لاجسٹکس مقرر ہوئے ہیں۔