لاہور(سپورٹس رپورٹر) پاکستان والی بال فیڈریشن کے زیر اہتمام چھ نمائشی میچز کا پہلا میچ شکر گڑھ میں کھیلا گیا جس میں پاکستان گرین ٹیم نے پاکستان وائٹ ٹیم کو 2 کے مقابلے 3 گیمز سے شکست دیدی۔ میچ کو دیکھنے کے لئے شائقین کی بڑی تعداد سٹیڈیم پہنچی جنہوں نے دونوں ٹیموں کو دل کھول کر داد دی۔ پانچ گیمز پر مشتمل میچ کا سکور 25-15 ، 25-23 ، 18-25، 23-25 اور 15-8 رہا۔ میچ کے اختتام پر مہمان خصوصی پاکستان والی بال فیڈریشن کے صدر نے فاتح ٹیم کو ٹرافی دی جبکہ ایم این اے دانیال عزیز نے فاتح پاکستان گرین ٹیم کو 10 ہزار اور رنر اپ ٹیم کو ساڑھے 7 ہزار روپے نقد انعام دیا۔ اس موقع پر ایم پی اے مولانا غیاث الدین نے دونوں ٹیموں کو پانچ پانچ ہزار روپے نقد انعام دیا۔ دونوں ٹیموں کے درمیان سیریز کا دوسرا میچ آج جمعرات کو سیالکوٹ میں کھیلا جائیگا۔