لاہور(سپورٹس رپورٹر) پنجاب یوتھ فیسٹیول میں یونین کونسل کی سطح پر کھیلوں کے دلچسپ مقابلے تیسرے روز بھی جاری رہے۔ صوبے کے مختلف اضلاع میں عوام کی بڑی تعداد نے کرکٹ، رسہ کشی ، باڈی بلڈنگ سمیت دیگر کھیلوں میں اپنی صلاحیتوں کے جوہر دکھائے۔ گزشتہ روز لاہور سمیت دیگر اضلاع میں مجموعی طور پر ایک لاکھ 47 ہزار سے زائد نوجوانوں نے مقابلوں میں حصہ لیا جن میں 38 ہزار سے زائد کامیاب قرار پائے۔ لاہور کے نشتر ٹائون کی اٹھارہ یونین کونسلوں میں 301 کھلاڑیوں نے مقابلوں میں حصہ لیا اور 116 کامیاب قرار پائے۔آرم ریسلنگ کے مقابلے میں عابد علی نے کامیابی حاصل کی جبکہ خاور علی نے دوسری پوزیشن حاصل کی۔ بیڈمنٹن میں باسط علی پہلے اور مبشر دوسرے نمبر پر رہے۔