کوئٹہ (این این آئی+ آئی این پی) ضلع پنجگور ائیرپورٹ پر دہشت گردی کی کوشش ناکام بنا دی گئی تاہم مسلح افراد چھ سیکورٹی اہلکاروں کو اغواء کرکے لے گئے۔ جمعرات اور جمعہ کی درمیانی شب نامعلوم افراد نے ائیرپورٹ کے قریب پانچ بم بھی نصب کئے تاہم وہ اپنے مقصد میں کامیاب نہیں ہو سکے۔ اطلاع ملنے پر پولیس اور سیکورٹی اہلکاروں نے ائیرپورٹ کو گھیرے میں لیکر بموں کو ناکارہ بنا دیا۔ پنجگور ائیرپورٹ کو سیکورٹی نے گھیرے میں لیا ہوا ہے۔ واضح رہے کہ پنجگور ائیرپورٹ سے کئی انٹرنیشنل فلائٹیں بیرون ملک جاتی اور آتی ہے اس واقعہ کے بعد ائیرپورٹ جانیوالے سڑک پر سیکورٹی ہائی الرٹ کردی گئی اور مزید تحقیقات جاری ہے۔ آئی این پی کے مطابق اغوا کاروں نے راڈار کو بھی آگ لگا دی اور جاتے ہوئے ریڈار نظام کے قریب پانچ سو گرام وزنی دھماکہ خیز مواد بھی نصب کر دیا جسے ناکارہ بنا دیا گیا۔ اغواء کار پولیس اہلکاروں کا اسلحہ بھی ساتھ لے گئے۔ سی اے اے کے مطابق دہشت گردوں نے وی او آر ٹاور کو دھماکہ خیز مواد سے تباہ کر دیا۔ وی او آر فضائی حدود میں طیاروں کی رہنمائی کرنے والا آلہ ہے۔ جہاز کو اپنے روٹ پر رکھنے کیلئے وی او آر زمین سے رہنمائی فراہم کرتا ہے۔