لاہور (مبشر حسن/ دی نیشن رپورٹ) بلاول بھٹو زرداری کے نئے مشیر نوابزادہ غضنفر گل نے کہا ہے کہ چیئرمین پیپلزپارٹی کی جانب سے سیاستدنوں کیلئے القابات اور الفاظ کا استعمال غلط نہیں۔ بلاول بھٹو زرداری آکسفورڈ کے گریجویٹ ہیں اور ان کی جانب سے عمران خان کو”بزدل خان“ اور پرویز مشرف کو ”ڈر پوک“ قرار دینے کے حوالے سے سماجی میڈیا کی ویب سائٹس پر تنقید کرنیوالوں کا جواب دیتے ہوئے نوابزادہ غضنفر گل نے کہاکہ چیئرمین تحریک انصاف عمران خان نے سیاست میں ہتک آمیز الفاظ اور القابات کا آغاز کیا تھا۔ عمران خان نے شریف برادران کو ”ڈینگی برادران“ کے القابات سے پکارا تھا اور اسی پس منظر میں بلاول بھٹو زرداری نے طالبان کے معاملے میں عمران خان کے رویے پر انہیں بزدل خان قرار دیا۔ بلاول بھٹو زرداری کے میڈیا مشیر فواد چودھری نے کہا کہ وزیراعلیٰ پنجاب شہباز شریف نے آصف زرداری کو جب وہ صدر تھے ان کیخلاف کئی بار توہین آمیز جملے بولے مگر تب کسی نے اس کیخلاف کوئی آواز نہیں اٹھائی۔ مشیروں کا کہنا تھا کہ بلاول بھٹو زرداری مناسب الفاظ استعمال کرینگے تاہم ان کی جانب سے استعمال کردہ الفاظ غلط یا نامناسب نہیں۔
غضنفر گل