لاہور + شرقپور (نامہ نگار) صوبائی دارالحکومت کے مختلف علاقوں میں  وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا گیا۔ سبزہ زار کے علاقہ میں ڈاکوؤں نے ڈکیتی مزاحمت پر 55 سالہ چوکیدار کو سر میں لوہے کے راڈمار کر کے قتل کر دیا جبکہ شرق پور شریف میں ڈاکوئوں نے مزاحمت پر ایک شخص کو فائرنگ کرکے موت کے گھاٹ اتار دیا۔ تفصیلات کے مطابق  سبزہ زار کے علاقہ اعوان ٹاؤن  میں رزاق نامی شخص کے پلاٹ پر 55سالہ بوٹا مسیح بطور چوکیدار کام کرتا تھا اور زیرتعمیر ایک کمرے میں رہائش پذیر تھا۔ گذشتہ روز رزاق کا بیٹا اور بھائی پلاٹ میں آئے تو چوکیدار بوٹا مسیح کمرے میں مردہ حالت میں پڑا تھا اور اس کی خون میں لت پت نعش چارپائی کے ساتھ اس کے کپڑوں کے ساتھ بندھی ہوئی تھی جبکہ کمرے سے سامان اور موبائل فون کے علاوہ پلاٹ میں کھڑی لاکھوں روپے مالیت کی کار بھی غائب تھی۔ شبہ ظاہر کیا جا رہا ہے کہ اسے ڈاکوؤں نے ڈکیتی مزاحمت پر قتل کیا ہے۔ ڈیفنس اے فیزفور میں چوروں نے چودھری اکرم کے گھر سے ڈیڑھ کروڑ روپے مالیت کی نقدی اور زیورات چوری کر لئے۔ مسلم ٹائون کے علاقہ 123 بی، نیو مسلم ٹائون کے رہائشی ہارون رشید کے گھر ڈاکوؤں نے گھس کر اس کی والدہ اور نوکرانی کو تشدد کا نشانہ بنا کرزخمی کر دیا اور ہزاروںروپے نقدی اور دو موبائل فون لوٹ کر لے گئے۔ سول لائن کے علاقہ میں موٹر سائیکل سواردو ڈاکوؤں نے شاہد محمود سے12لاکھ روپے اور موبائل فون، مغلپورہ میں طاہر کے گھر گھس کر 8لاکھ روپے، نواب ٹائون میں علی زین کے گھر سے8لاکھ روپے کی نقدی، طلائی زیورات اور دیگر سامان لوٹ لیا۔ بادامی باغ ٹرالر سٹینڈ پر تین ڈاکوئوں نے مالک وحید اور اس کے2 سکیورٹی گارڈوں کو رسیوں سے باندھ کر ٹرالر سے سوا تین لاکھ روپے مالیت کا پٹرول لے کر فرار ہو گئے۔ ڈاکوؤں نے ساندہ حکیماں والا بازار میں اسد کی موبائل شاپ سے ڈیرھ لاکھ روپے اور پانچ موبائل فون، گلشن اقبال میں فرحان سے 1لاکھ 36ہزار روپے اور موبائل فون، نواب ٹائون میں حبیب سے 1لاکھ 20ہزار روپے اور موبائل فون ، ساندہ میںوقار سے 1لاکھ روپے اور موبائل فون، فیصل ٹائون میں علی حیدر سے 50ہزار روپے،موٹر سائیکل اور موبائل فون ،گلشن اقبال میں امتیاز سے 70ہزار روپے  اور موبائل فون،غالب مارکیٹ میں نوید سے 60 ہزار روپے اور موبائل فون ،گارڈن ٹائون میں امتیاز سے 55 ہزارروپے اور موبائل فون،شاہدرہ میں حسین سے 51ہزار روپے  اور موبائل فون ،،کاہنہ میں خالد سے 40ہزار روپے ، موٹر سائیکل اور موبائل فون، فیصل ٹائون میں فیصل سے 30ہزار روپے اور موبائل فون ،مسلم ٹائون میں ہارون سے 20ہزار روپے اور موبائل فون لوٹ لیا۔ مکہ کالونی میں اہل علاقہ نے امداد علی کے گھر میں چوری کی واردات سے گھسنے والے چور رمضان کو پکڑ لیا اور اس کی خوب دھنائی کے بعد اس کا سر مونڈھ کر پولیس کے حوالے کر دیا ہے۔ چوروں نے سمن آباد سے کامران، لیاقت آباد سے ندیم، مصطفی آباد سے میجر ہمایوں، شاہدرہ سے فریاد کی کاریںجبکہ باغبانپورہ سے توحید، پرانی انارکلی سے سلیم، اسلام پورہ سے منیر اور ذیشان،شاد باغ سے عظیم ،شفیق آباد سے علی، ساندہ سے رضا، شیرا کوٹ سے عمیر، نواں کوٹ سے زرغام، سبزہ زار سے اشرف،ٹائون شپ سے حسن، شا ہدرہ سے فرہاد،گلشن راوی سے سلیم،کوٹ لکھپت سے علی رضا اور خرم ، غالب مارکیٹ سے اویس، فیکٹری ایریا سے عظمت،شمالی چھائونی سے فضل، غازی آبادسے شاہ زین کی موٹر سائیکلیں چو ری کر لیں۔ ادھر شرق پور شریف میں 3 ڈاکوئوں نے موٹر سائیکل رکشہ پر سوار افراد کو لوٹنے کی کوشش کی ایک سواری نے مزاحمت کی تو فائرنگ کر دی جس کے باعث اویس دم توڑ گیا جب کہ ایک شخص زخمی ہو گیا۔ مشتعل افراد نے واقعہ کے خلاف شرق پور، لاہور، جڑانوالہ روڈ فتووالا کے قریب ٹائر جلا کر ٹریفک بلاک کر دی۔ موٹرسائیکل رکشہ پر سوار 6 افراد جا رہے تھے کہ ڈاکوئوں نے روک لیا۔ مظاہرین نے احتجاج کے دوران پولیس کے خلاف شدید نعرے بازی بھی کی۔  
ڈاکے/چوکیدار مار ڈالا