سیالکوٹ(نامہ نگار) تھانہ کوتوالی کے علاقہ میں دال چاول کی پلیٹ کا بیس روپے بل مانگنے پر شراب میں دھت ملزم نے فائرنگ کرکے ریڑھی بان کو قتل کردیا۔ عینی شاہدین کے مطابق بیری والاچوک میں رات کو ریڑھی بان نوجوان شعیب سے شراب کے نشہ میں دھت ملزم عمر نے دال چاول کی پلیٹ کھانے کیلئے لی اور دال چاول کھانے کے بعد بیس روپے کا بل نہ دیا۔ بیس روپے مانگنے پر ملزم عمر نے پستول سے فائرنگ کرکے شعیب کو شدید زخمی کردیا اور موقع سے اسلحہ لہراتے ہوئے فرار ہوگیا۔ زخمی شعیب کو ہسپتال لایا گیا لیکن وہ زخموں کی تاب نہ لاکردم توڑ گیا۔ پولیس نے مقدمہ درج کرکے کارروائی شروع کردی ہے۔ ڈی ایس پی مقصود لون نے بتایا ملزم کی گرفتاری کیلئے چھاپے جاری ہیں۔