مانانوالہ (نامہ نگار) مانانوالہ کے قریب سے گزرنے والی پاک عرب آئل ریفائنری کی پائپ لائن سے لاکھوں روپے مالیت کے ہزاروں لیٹر تیل کی چوری کا انکشاف ہوا ہے۔ مقامی پولیس اور دیہاتیوںکے ساتھ زبردست فائرنگ کے تبادلہ کے بعد نامعلوم چور فرار ہونے میں کامیاب ہوگئے۔ بتایا گیا ہے پولیس تھانہ مانانوالہ کو مخبری ہوئی نواحی قلعہ شبدیو سنگھ میں نامعلوم چور پائپ لائن سے والو لگا کر قریب ہی ایک حویلی میں تیل چوری کر رہے ہیں۔اطلاع پر پولیس نے دیہاتیوں کے ہمراہ چھاپہ مارا تو نامعلوم چور فائرنگ کرتے ہوئے رات کی تاریکی میں فرار ہو گئے۔ پولیس نے حویلی سے ایک موٹر سائیکل اور تیل لوڈ کرکے لے جانے والی گاڑی قبضہ میں لے کر ملزمان کی تلاش شروع کر دی ہے۔