ہنگو+ کوئٹہ (نیوز ایجنسیاں) ہنگو کے علاقے طوراوڑی میں مقیم سیکورٹی فورسزکے اہلکارسبزی خریدنے بازارجارہے تھے کہ نامعلوم موٹرسائیکل سواروں نے اندھادھندفائرنگ کی جس کے نتیجے میں ایف سی اہلکارمدام گل جاں بحق ہو گیا۔ بعد میں فورسز نے علاقے میں سرچ آپریشن کیا اور آٹھ مشتبہ افراد کو گرفتار کر لیا ہے۔  ادھر ڈیرہ بگٹی کے علاقے سے لیویز کے عملے نے ایک نامعلوم شخص کی گولیوں سے چھلنی نعش برآمد کر لی۔ تفصیلات کے مطابق گزشتہ روز لیویز کے عملے کو پیرکوہ کے علاقے سے ایک نامعلوم شخص کی نعش ملی جسے نامعلوم افراد نے فائرنگ کرکے قتل کرنے کے بعد ویران مقام پر پھینک دیا تھا۔ علاوہ ازیں پنجگور کے علاقے میں نامعلوم افراد کی جانب سے سکیورٹی فورسز کے کیمپ پر فائر کئے جانے والے راکٹ کے تین گولے کھلے میدان میں گر کر زور دار دھماکوں سے پھٹ گئے۔ پنجگور میں سکیورٹی فورسز کے کیمپ پر نامعلوم سمت سے نامعلوم افراد نے یکے بعد دیگرے راکٹ کے تین گولے فائر کئے جو کیمپ کے قریب مختلف مقامات پر گر کر زور دار دھماکوں سے پھٹ گئے تاہم کسی جانی نقصان کی اطلاع نہیں ملی۔