لاہور +کاہنہ (سٹاف رپورٹر  +نامہ نگار) لاہور کے علاقے کاہنہ میں تھانہ کے بالمقابل دن دیہاڑے 2 کروڑ روپے سے زائد کی ڈکیتی کے دوران مزاحمت پر سکیورٹی گارڈ اور پھل فروش جاں بحق، دو راہ گیر اور ایک سکیورٹی گارڈ شدید زخمی ہو گئے جبکہ شہر کے مختلف حصوں میں ڈکیتی چوری کی متعدد وارداتوں میں لاکھوں روپے کی نقدی اور مال لوٹ لیا گیا۔ تفصیلات کے مطابق سر شام کاہنہ مین بازار میں جاوید زرگر، مہتاب زرگر اور اسلم زرگر کی دکانوں سے دس سے زائد ڈاکو 2 کروڑ روپے سے زائد مالیت کے طلائی زیورات اور نقدی لوٹ کر فرار ہونے لگے پولیس موقع واردات پر پہنچنے کے باوجود خاموش تماشائی بنی رہی۔ سکیورٹی گارڈ کی مزاحمت پر ڈاکوئوں نے اندھا دھند فائرنگ کر دی جس سے سکیورٹی گارڈ سرفراز احمد اور وارڈ نمبر 13 کاہنہ کا رہائشی چار بچوں کا باپ پھل فروش  تاج دین موقع پر جاں بحق ہو گئے جبکہ دو راہگیر امتیاز اور منور اور ایک سکیورٹی گارڈ شدید زخمی ہو گئے جنہیں جنرل ہسپتال منتقل کر دیا گیا۔ واقعہ کیخلاف تاجروں اور اہل علاقہ نے جاں بحق دونوں افراد کی میتیں سڑک پر رکھ کر مظاہرہ کیا اور فیروز پور روڈ کو تقریباً دو گھنٹے تک بلاک رکھا اور کاہنہ پولیس کے خلاف شدید نعرے بازی کی۔دریں اثناء شمائی چھائونی عسکری 9 کے کرنل (ر) سید غیاث الدین کے گھر سے چور 10 لاکھ مالیت کی نقدی زیورات اور دیگر قیمتی اشیا لے گئے اسلام پورہ میں ڈاکوئوں نے مسعود سے 4 لاکھ روپے مالیت کی نقدی، زیورات، شاہدرہ ٹائون میں ڈاکوئوں نے رفاقت سے 3 لاکھ 50 ہزار روپے مالیت کی نقدی و زیورات لوٹ لئے۔ ستوکتلہ میں ڈاکوئوں نے سیف سے 3 لاکھ روپے مالیت کی نقدی، زیورات، نواب ٹائون میں ڈاکوئوں نے سجاد سے 3 لاکھ 50 ہزار روپے مالیت کی نقدی و زیورات، ڈیفنس بی میں ڈاکوئوں نے راشد اور اس کی فیملی سے 3 لاکھ روپے مالیت کی نقدی و زیورات، ہربنس پورہ میں رضوان سے 1 لاکھ 10 ہزار روپے کی نقدی و موٹر سائیکل، برکی میں یٰسین سے 15 ہزار روپے کی نقدی و موبائل، باغبانپورہ میں ادریس سے 40 ہزار روپے، و موبائل، شالیمار میں سلیمان سے 46 ہزار روپے اور موٹر سائیکل، مزنگ میں طاہر سے 80 ہزار روپے اور موٹر سائیکل، گجر پورہ میں شاہد سے 1 لاکھ 18 ہزار روپے، مانگا منڈی میں حنیف سے 1 لاکھ 50 ہزار روپے اور موٹر سائیکل، غالب مارکیٹ میں عثمان سے 85 ہزار روپے، گلبرگ میں عابد سے 15 ہزار روپے اور موبائل، اچھرہ میں مسعود سے 32 ہزار روپے اور موبائل چھین لیا۔ پرانی انارکلی میں ذوالفقار، مغل پورہ میں ریاض، مزنگ میں عابد، مصری شاہ میں کاشف کی گاڑیاں جبکہ اسلام پورہ میں اصغر، باٹا پور میں محبوب، ہربنس پورہ میں فہیم، جنوبی چھائونی میں طاہر، ریس کورس میں رحیم، اقبال ٹائون میں نعمان، نواں کوٹ میں علی کی موٹر سائیکلیں چوری کر لی گئیں۔