لورالائی، کوئٹہ (نوائے وقت رپورٹ + آن لائن) لورالائی میں ٹرکوں اور پولیس گاڑی پر شدت پسندوں نے فائرنگ کی اور راکٹوں سے حملہ کیا۔ پولیس کی جوابی کارروائی سے حملہ آور فرار ہوگئے۔ کوئی جانی نقصان نہیں ہوا۔ ڈیرہ بگٹی کے علاقے پیر کوہ سوری کے مقام سکیورٹی فورسز کی چیک پوسٹ کے قریب نامعلوم افراد کی جانب سے چھپایا جانے والے ریمورٹ کنٹرول بم زور دار دھماکے سے پھٹ گیا جس سے کسی قسم کے جانی و مالی نقصان کی اطلاع نہیں ملی۔ ادھر کوئٹہ کے نواحی علاقے سے پولیس نے 2 نامعلوم افراد کی نعشیں تحویل میں لے کر ہسپتال پہنچا دیں۔ پولیس کو اطلاع ملی کہ تھانہ سیٹلائٹ ٹائون کے علاقے رند گڑھ کے قریب نامعلوم افراد کی نعشیں پڑی ہیں۔ پولیس کے مطابق نعشیں ناقابل شناخت ہیں۔ ادھر قلعہ عبداللہ کے علاقے دولنگی میں فائرنگ سے پولیو ویکسینیشن کرنے والا ایک ورکر زخمی ہوگیا۔ ادھر ڈیرہ مراد جمالی میں گھر کی دیوار کیساتھ ٹائمر بم سے دھماکے کے نتیجے میں دیوار کو نقصان پہنچا اور علاقے میں خوف و ہراس پھیل گیا تاہم کسی جانی کی نقصان کی اطلاع نہیں ملی۔