ویلنٹائن ڈے: فیصل آباد میں گرلز کالج کے سامنے سے 28 نوجوان پولیس کے ہتھے چڑھ گئے، اوکاڑہ، چیچہ وطنی اور سمبڑیال میں منچلوں کی لڑکیوں کے ہاتھوں چھترول
فیصل آباد+ لاہور (نمائندہ خصوصی+ نامہ نگاران) ویلنٹائن ڈے کے موقع پر فیصل آباد میں گرلز کالج کے سامنے غل غپاڑہ کرتے، پھول پھینکنے اور طالبات پر آوازیں کسنے کے الزام میں 28سالہ نوجوان پولیس کے ہتھے چڑھ گئے جبکہ پھول پیش کرنے پر اوکاڑہ، چیچہ وطنی اور سمبڑیال میں منچلوں کی چھترول کر دی گئی۔ فیصل آباد میں ویلنٹائن ڈے کے موقع پر کی خرمستیاں، چھیڑخانی، غل غپاڑہ کرنے، طالبات پر آوازیں کسنے اور پھول پھینکنے پر 28 نوجوان پولیس کے ہتھے چڑھ گئے جنہیں تھانوں کی حوالات میں بند کر دیا گیا۔ سائلنسر نکال کر جمپ اٹھانے، موٹرسائیکل تیزرفتاری سے چلانے اور کرتب دکھانے پر بھی بعض نوجوان حراست میں پولیس نے لئے اور آئندہ ایسی خرمستیاں نہ کرنے کی توبہ کرنے پر چھوڑ دیا گیا۔ تفصیلات کے مطابق سی پی او فیصل آبا د ڈاکٹر حیدر اشر ف کی ہدایت پر مدینہ ٹائون پولیس نے مدینہ ٹائون وومن کالج کی انتظامیہ کی شکایت پر کارروائی کرتے ہوئے کالج کے سامنے غل غپاڑہ کرنے اور لڑکیوں کو تنگ کرنے کے الزام میں 28افراد کو حراست میں لے لیا گیا، کالج انتظامیہ نے اس بارے میں مدینہ ٹائون پولیس سے شکایت کی تھی کہ ویلنٹائن ڈے کی وجہ سے کالج کے سامنے نوجوان آنے جانے والی لڑکیوں کو تنگ کر رہے ہیں گرفتار ہونے والے نوجوانوں میں بلا ل سہیل، علی رضا ، گلزار احمد، منیل احمد، مختار خان، وقاص ناصر، سہیل احمد اورمحفوظ الحق وغیرہ شامل ہیں۔ نوجوانوں کو مرغا بھی بنایا گیا جبکہ ان کے 15موٹر سائیکل بھی تھانہ میں بند کر دئیے گئے۔ اوکاڑہ سے نامہ نگار کے مطابق ویلنٹائن ڈے کے موقع پر لڑکی کو دئیے جانے والا پھول عاشق کو پانچ ہزار روپے میں پڑ گیا، لڑکی کی سہلیوں نے مبینہ عاشق کی پٹائی کر دی اس کی جیب سے پانچ ہزار روپے نکال کر اپنی کلاس کی تمام لڑکیوں کو ریفریشمنٹ پر خرچ کر دئیے بعد ازاں لڑکے کو مرغا بننے کی پر معافی دے دی گئی قریب سے گزرنے والے اس منظر سے لطف اندوز ہوتے رہے۔ تفصیلات جی ٹی روڈ پر واقع ایک نجی کالج کی طالبہ ارم شہزادی کو دو ماہ سے منڈی احمد آباد کا رہائشی لڑکا وقاص عرف سوہنی اکثر موبائل فون پر تنگ کرتا تھا۔ گذشتہ روز اس نے متعد د فون کر کے ارم کو ویلنٹائن ڈے پر ملنے کا اصرار کیا جس پر ارم نے اپنے گروپ کی سہلیوں کو بتایا جس کے بعد اس کی سہلیوں نے مبینہ عاشق کو سبق سکھانے کی ٹھان لی اور ارم کے ذریعے فون کر کے وقاص کو اپنے کالج کے باہر ملنے کا ٹائم طے کر لیا وقاص جیسے ہی وہاں پہنچا ارم نے اپنی کلاس کی درجنوں طالبات کے ہمراہ اس کو گھیرے میں لیتے ہوئے اس کی درگت بنا ڈالی لڑکے نے جی ٹی روڈ پر کالج کے سامنے ایک منٹ کے لئے مرغا بن کر اور بعد ازاں جیب میں موجود پانچ ہزار کی رقم سے ارم کی سہلیوں کو ریفریشمنٹ کروانے اور چاکلیٹ لے کر دینے کے بعد اپنی جان بخشی کروائی۔ چیچہ وطنی سے نامہ نگار کے مطابق ویلنٹائن ڈے کے موقع پر سرخ پھول پیش کرنے پر لڑکی نے جوتوں سے نوجوان کی دھلائی کر دی۔ محلہ گٹوشالہ کا رہائشی دلبر جان نے بھرے بازار میں جانے والی ایک لڑکی کو سرخ پھول پیش کرتے ہوئے اپنی محبت کا اظہار کیا جس پر لڑکی نے اپنا جوتا اتار کر نوجوان پر برسانا شروع کر دیا۔ بعدازاں سڑک پر ناک سے لکیریں نکالنے پر اسے چھوڑ دیا گیا۔ سمبڑیال سے نامہ نگار کے مطابق ویلنٹائن ڈے کے موقع پر کالج کی طالبہ نے صبح کے وقت کالج آتے ہوئے راستے میں دو منچلوں لیاقت اور عرفان کی جانب سے ’’پھول‘‘ پیش کرنے پر سرعام جوتوں سے چھترول کر دی اور گالیوں سے تواضع کی جس پر دونوں منچلے نوجوان موقع سے جان چھڑا کر بھاگ نکلنے میں کامیاب ہو گئے۔
