شہباز شریف چین کے 5 روزہ دورے پر چلے گئے، صدر ممنون حسین آج جائینگے
لاہور+ اسلام آباد (خصوصی رپورٹر+ اے پی پی) وزیراعلیٰ پنجاب محمد شہبازشریف چین کے پانچ روزہ دورے پر سوموار کی شب لاہور ائرپورٹ سے بیجنگ روانہ ہوگئے جبکہ صدر ممنون حسین آج چین کے دورے پر روانہ ہونگے۔ شہباز شریف کے ہمراہ جانے والوں میں ا کے میڈیا ایڈوائزر شعیب بن عزیز بھی شامل ہیں۔ وزیراعلیٰ پنجاب شہباز شریف 21 فروری کی شام وطن واپس لوٹیں گے۔ ادھر صدر ممنون حسین سے پیر کو پاک بحریہ کے سربراہ ایڈمرل آصف سندھیلہ نے ایوان صدر میں ملاقات کی اور پاک بحریہ کے پیشہ وارانہ امور پر تبادلہ خیال کیا۔ ترجمان دفتر خارجہ نے صدر کے دورے کی تفصیلات سے آگاہ کرتے ہوئے بتایا کہ صدارت کا منصب سنبھالنے کے بعد یہ صدر مملکت ممنون حسین کا پہلا بیرونی سرکاری دورہ ہے۔ صدر مملکت ممنون حسین صدر ژی جن پنگ کے علاوہ وزیراعظم لی کی چیانگ اور چین کی قومی پیپلز کانگریس کی قائمہ کمیٹی کے چیئرمین ژانگ دی جیانگ کے علاوہ اعلیٰ سرکاری عہدیداران سے بھی ملاقات کرینگے۔
