لاہور + گوجرانوالہ (سٹاف رپورٹر + نمائندہ خصوصی) شہر میں چوری و ڈکیتی کی درجنوں وارداتوں میں ڈاکوئوں اور چوروں نے شہریوں کو لاکھوں روپے مالیت کی نقدی، زیورات، موبائل فونز، موٹر سائیکلوں اور گاڑیوں و قیمتی سامان سے محروم کر دیا ہے جبکہ  گوجرانوالہ میں مبینہ پولیس مقابلے میں ایک ڈاکو زخمی حالت میں گرفتار، 2 فرار ہو گئے۔ معلوم ہوا ہے ٹائون شپ میں ڈاکوئوں نے افضل کے گھر سے10لاکھ کے زیورات، نقدی اور موبائل، غازی آباد میں ڈاکوئوں نے رضا کے گھر سے5 لاکھ کے زیورات، نقدی اور موبائل، مناواں میں رشید کے گھر سے5لاکھ، سندر میں رحمان کے گھر سے5لاکھ، برکی میں سلطان کے گھر سے3لاکھ، شاہدرہ ٹائون میں اویس کے گھر سے3لاکھ کے، نصیر آباد میں گوہر کے گھر سے اڑھائی لاکھ، ساندہ میں کرامت کے گھر سے2 لاکھ، مصطفی ٹائون میں ریاض کی فیملی سے ایک لاکھ، ٹبی سٹی میں نثار کی فیملی سے ایک لاکھ، گلشن اقبال میں شفقت کی فیملی سے ایک لاکھ، لیاقت آباد میں جہانگیر کی فیملی سے ایک لاکھ، مزنگ میں نعیم کی فیملی سے بھی ایک لاکھ کے زیورات، نقدی اور موبائل فون چھین لیا۔ جنوبی چھائونی میں چوروں نے شاہد موبائل شاپ سے2لاکھ، راوی روڈ میں چوروں نے حنیف کی دکان سے 2 لاکھ کا سامان چوری کر لیا۔ فیصل ٹائون میں کاشف، سبزہ زار میں محمود، نواب ٹائون میں ہارون کی گاڑیاں جبکہ باغبانپورہ میں اسد، اقبال ٹائون میں عبدالقادر، ملت پارک میں حماد اور شمالی چھائونی میں امتیاز کی موٹر سائیکلیں چوری کر لی گئیں۔   علاوہ ازیں گوجرانوالہ میں بمبو والی میں مبینہ پولیس مقابلہ کے دوران ایک ڈاکو زخمی حالت میں گرفتار جبکہ اس کے دو ساتھی فرار ہوگئے۔ نندی پور کے قریب بمبووالی میں ایلیٹ فورس کے اہلکاروں نے موٹرسائیکل سوار تین افراد کو رکنے کا اشارہ کیا تو ملزمان نے ان پرفائرنگ شروع کردی جبکہ دو طرفہ فائرنگ کے نتیجے میں ایک ڈاکو زخمی ہوگیا جسے اس کے دو ساتھی وہیں چھوڑ کر فرا رہوگئے۔پولیس نے مضروب ڈاکو کو  طبی امداد کی فراہمی کے لئے سٹرکٹ ہسپتال منتقل کیا جہاں سے اسے تشویشناک حالت میں لاہور ریفر کر دیا گیا۔ گرفتار ڈاکو کا نام نصیر ہے اس کے قبضہ سے واردات کے دوران شہریوں سے لوٹے ہوئے 22 ہزار روپے نقدی اور طلائی زیورات بھی برآمد ہوئے ہیں۔