لاہور (کلچرل رپورٹر+نوائے وقت رپورٹ) اداکارہ دیدار کی رسم حنا گزشتہ روز جوہر ٹائون میں واقع ایک ہال میں ہوئی جس میں شوبز کی اہم شخصیات نے شرکت کی۔ تقریب کے شرکا میں اداکارہ صائمہ خان، میگھا، ماہ نور، ناصر چنیوٹی اور ڈریس ڈیزائنر بابو ودیگر شامل تھے۔ یاد رہے اداکارہ دیدار کا نکاح ایک سال قبل حافظ آباد کے رہائشی حمزہ بھٹی سے ہوا تھا۔ حمزہ بھٹی اور دیدار کی دعوتِ ولیمہ آج بروز پیر جوہر ٹائون میں ہوگی۔ نوائے وقت رپورٹ کے مطابق دیدار کی اُبٹن کی رسم ہفتے کی شب ہوئی تھی۔ حمزہ بھٹی کا تعلق جلالپور بھٹیاں سے ہے جبکہ تقریب میں حمزہ بھٹی کے اہل خانہ شریک نہیں ہوئے۔ آئی این پی کے مطابق اداکارہ دیدار کی رسم حنا تقریب پر نشتر ٹائون کی انتظامیہ نے چھاپہ مارا اور ایک شخص کو گرفتار کر لیا جب کہ اداکار ہ کے خلاف ٹی ایم او شریف سندھو کی درخواست پر مقدمہ درج کر لیا۔ اداکارہ نے چھاپہ مار ٹیم کو سنگین نتائج کی دھمکیاں دیں اور تقریب ختم کرنے سے صاف انکار کر دیا۔ ذرائع کے مطابق اتوار کی رات 10 بجے تقریب ختم کرنے کی پابندی کے باوجود اداکارہ دیدار کی رسم حنا کی تقریب رات 12 بجے تک کوٹ لکھپت کے علاقہ میں جاری رہی جس کے بعد نشر ٹائون کی انتظامیہ نے چھاپہ مار کر شہزاد نامی ایک شخص کو گرفتار کر لیا جب کہ اداکارہ کیخلاف تھانہ گرین ٹائون میں مقدمہ درج کر لیا گیا تاہم اس کے باوجود تقریب کا سلسلہ رات 12 بجے چھاپے کے بعد بھی جاری رہا۔