سیالکوٹ + ترگ (نامہ نگاران) خاوند کے انتقال کے ایک گھنٹہ بعد بیوی بھی چل بسی۔ قصبہ اگوکی میں عبدالرزاق کی طبیعت ناساز ہونے پر سیالکوٹ میڈیکل کمپلیکس میں داخل کروا دیا گیا جہاں پر عبدالرزاق انتقال کر گیا۔ خاوند کے انتقال کی تصدیق ہونے پر عبدالرزاق کی بیوی کی طبیعت خراب ہو گئی اور ایک گھنٹہ کے بعد انتقال کر گئی۔ دونوں میاں بیوی کو گزشتہ روز نماز جنازہ کے بعد مقامی قبرستان میں سینکڑوں سوگواروں کی موجودگی میں سپردخاک کر دیا گیا۔ مزید برآں ترگ کے نامہ نگار کے مطابق ریٹائرڈ پوسٹ ماسٹر نذر حسین قضائے الٰہی سے وفات پا گئے۔ ان کی میت ابھی گھر میں پڑی تھی کہ ان کی بیوی بھی دو گھنٹے بعد چل بسی۔ دونوں کی نماز جنازہ مقامی آبائی قبرستان میں ادا کی گئی۔ متوفیان نذر حسین شاہ اور ان کی اہلیہ مکڑوال پوسٹ آفس کے پوسٹ مین عابد حسین شاہ کے والدین تھے۔ مرحومین کی عمریں 78اور 82سال تھیں۔