ڈھاکہ(اے پی پی/این این آئی) ایشیا کپ میں دفاعی چیمپئن پاکستان اپنا تیسرا میچ آج روایتی حریف بھات کے خلاف  شیر بنگلہ نیشنل سٹیڈیم میر پور میں کھیلے گا۔ میچ ڈے اینڈ نائٹ ہوگا اور پاکستانی وقت کے مطابق دن ایک بجے شروع ہوگا۔ فائنل تک رسائی کیلئے دونوں ٹیموں کیلئے یہ میچ انتہائی اہمیت کا حامل ہے جو بھی ٹیم یہ میچ جیتے گی اس کے فائنل میں پہنچنے کے امکانات روشن ہو جائیں گے۔قومی کرکٹ ٹیم کے کپتان مصباح الحق نے غیر ملکی میڈیا سے گفتگو میں انتہائی پر اعتماد انداز میں بات کرتے ہوئے کہا ہے کہ بھارت کے خلاف بہترین منصوبہ بندی کے ساتھ میدان میں اتریں گے ۔ انہوںنے کہا کہ بنگلہ دیش روانگی سے قبل ہم نے طے کر رکھا ہے کہ کسی بھی ٹیم کو آسان حریف نہیں لیں گے اور اسی کے مطابق آگے بڑھ رہے ہیں ۔ گرین شرٹس کے قائد نے مزید کہا کہ یہ انتہائی مثبت ہے کہ کھلاڑی اپنی غلطیوں سے سیکھ رہے ہیں اور کارکردگی بھی دکھا رہے ہیں ۔ تمام کھلاڑی بھارت کے خلاف کارکردگی دکھانے کے لئے پرعزم ہیں۔