لاہور(نامہ نگار)صوبائی دارالحکومت کی مختلف سڑکوں پرگزشتہ روزچھٹی کے باعث نوجوان ٹولیوں کی شکل میں موٹرسائیکلوں پر ونگ ویلنگ اور خطرناک کرتب کرتے رہے ۔ موٹر سائیکل ریس پر جواء بھی ہوتا رہا جبکہ پولیس ون ویلنگ پر قابو پونے میں ناکام و بے بس دکھائی دیتی ہے ۔تفصیلات کے مطابق صوبائی دارالحکومت کی مختلف سڑکوں پر گزشتہ روز نوجوان موٹر سائیکل پر ونگ ویلنگ اور ریس لگاتے رہے۔ مین بلیوارڈ گلبرگ،کینال روڈ ،جیل روڈ،شاہراہ قائد اعظم ، ڈیفنس سمیت دیگر اہم شاہراہوں پر موٹرسائیکل پر ونگ ویلنگ کا سلسلہ جاری رہا ۔نوجوان لڑکے ٹولیوں کی صورت میںموٹرسائیکلوں پر ونگ ویلنگ،خطرناک کرتب کرتے اور ریس لگاتے دکھائی دئیے۔ علاوہ ازیںپولیس ونگ ویلنگ کو روکنے میں مکمل طور پر ناکام نظر آ رہی ہے جبکہ پولیس کی طرف سے موٹرسائیکلوں پر ون ویلنگ کرنے والوں کے خلاف کارروائی نہ کرنے کی وجہ سے شہر کی بڑی سڑکوں پر اس خطرناک کھیل میں اضافہ ہو رہا ہے۔ ونگ ویلنگ کرنے والے منچلوں کی جانب سے فیملیز سے بدتمیزی اور خواتین سے چھیڑ خانی کرنے کے واقعات بھی بڑھ رہے ہیں ۔اس کے علاوہ شہر میں موٹر سائیکل ریس پر جواء عروج پر پہنچ چکا ہے۔اس صورتحال پر شہریوں نے شدید احتجاج کرتے ہوئے اعلی حکام سے نوٹس لینے کی اپیل کی ہے۔