ملتان (نمائندہ خصوصی) ملتان میں پولیس مقابلہ کے دوران  4 ڈاکو ہلاک جبکہ ایک فرار ہونے میں کامیاب ہو گیا۔ یہ بات ایس ایس پی کامران عادل نے گزشتہ روز پریس کانفرنس کے دوران بتائی۔ انہوں نے بتایا کہ مظفر آباد کے علاقے القریش ماڈل ٹاؤن میں 5 ڈاکو ایک گھر میں داخل ہوئے۔ اہل خانہ کے شور مچانے پر کار میں بھاگ نکلے۔ بہاولپور بائی پاس پر پولیس اہلکاروں نے انہیں روکنے کی کوشش کی جس پر ڈاکوئوں نے فائرنگ کر دی۔ پولیس کی جوابی فائرنگ سے 4 ڈاکو ہلاک ہو گئے جبکہ ایک ملزم شہری سے موٹر سائیکل چھین کر فرار ہو گیا۔ ہلاک ہونے والوں میں وجاہت عرف رفیق اچھرہ لاہور کا رہائشی جبکہ مقبول‘ نوید سکنہ بھکر اور ایک نامعلوم شامل ہیں۔ ملزمان ضلع ملتان میں 15 سے زائد ڈکیتی کی سنگین وارداتوں میں پولیس کو مطلوب تھے۔