لاہور (خصوصی رپورٹر) وزیراعلیٰ پنجاب محمد شہباز شریف کو ترکی کی قیادت اور حکومت کی طرف سے ان کے ایک روزہ دورہ ترکی کے دوران غیرمعمولی پروٹوکول دیا گیا۔ ترک وزیراعظم طیب اردگان نے وزیراعلیٰ کے لئے خصوصی طور پر ایوان وزیراعظم میں عشایئے کا اہتمام کیا۔ سفارتی حلقوں کے مطابق ترکی میں وزیراعظم کی طرف سے ایسی دعوت عام طور پر سربراہان مملکت کے اعزاز میں دی جاتی ہے۔  وزیراعظم کے معاون خصوصی برائے خارجہ امور طارق فاطمی‘ چیئرمین لاہور ٹرانسپورٹ کمپنی خواجہ احمد حسان اور ترکی میں پاکستان کے سفیر بھی دعوت میں موجود تھے۔ وزیراعظم ترکی نے اس موقع پر شہباز شریف کو خوش آمدید کہتے ہوئے کہا کہ مجھے ایک بار پھر آپ سے ملاقات کر کے دلی مسرت ہوئی ہے۔ ہم حالیہ برسوں کے دوران پاک ترک تعلقات اور دوستی کے فروغ میں آپ کے کردار کے معترف ہیں۔ میرے گذشتہ دورہ پاکستان کے دوران اہل لاہور نے میری میزبانی کا حق ادا کر دیا تھا اور اس استقبال کی خوشگوار یادیں میری زندگی کا سرمایہ ہیں۔