میران شاہ(ثناء نیوز)  شمالی وزیرستان ایجنسی کے مختلف علاقوں میں غیر معینہ مدت کیلئے کرفیو نافذ کردیا گیا ہے، پولیٹیکل انتظامیہ کے مطابق کرفیو کے دوران ہر قسم کی نقل و حرکت پر پابندی عائد ہوگی۔پولیٹیکل انتظامیہ کے مطابق شمالی وزیرستان ایجنسی میں میران شاہ سے مرکزی شاہراہ بنوں تک غیر معینہ مدت کیلئے کرفیو نافذ کردیا گیا ہے۔ امن و امان کی صورت حال کے پیش نظر میران شاہ سے دتہ خیل کی چیک پوسٹ بویا تک غیر معینہ مدت کیلئے کرفیو نافذ رہے گا۔پولیٹیکل انتظامیہ کے ذرائع کا کہنا ہے کہ ایجنسی میں امن و امان کی مخدوش صورت حال کے پیش نظر کرفیو کا نفاذ عمل میں لایا گیا۔ میران شاہ سے ملحقہ علاقوں میں بھی پٹرولنگ بڑھا دی گئی ہے اور علاقوں کے داخلی اور خارجی راستوں پر سکیورٹی کو مزید سخت کر دیا گیا ہے۔دوسری جانب میران شاہ کے علاقے میں دیر دونی چیک پوسٹ کے قریب سکیورٹی فورسز نے دہشت گردوں کی جانب سے سے نصب ریموٹ کنٹرول بم ناکارہ بنا دیا۔