اٹک+ ڈیرہ اسماعیل خان (نیوز ایجنسیاں) ڈیرہ اسماعیل خان کے علاقے شیروکونہ میں نامعلوم افراد کی فائرنگ سے پولیو ٹیم کی حفاظت پر مامور 2 اہلکار جاں بحق ہو گئے۔ پولیس کے مطابق گزشتہ روز ڈیرہ اسماعیل خان کے علاقے درابن روڈ پر شیروکونہ کے مقام پر انسداد پولیو مہم میں ٹیموں کو سکیورٹی فراہم کرنے والے 2 پولیس اہلکار ڈیوٹی ختم کر کے گھر واپس جا رہے تھے کہ گھات لگائے نامعلوم افراد کی جانب سے فائرنگ کی گئی جس کے نتیجے میں دونوں اہلکار جاں بحق ہو گئے جبکہ ملزمان موقع سے فرار ہو گئے۔ پولیس نے موقع پر پہنچ کر تفتیش شروع کر دی۔ جاں بحق ہونے والوں کی شناخت کانسٹیبل ادریس اور الیاس کے نام سے ہوئی ہے۔ ادھر حسن ابدال کے گائون کوٹ سونڈکی میں عالمی ادارہ صحت کی جانب سے جاری پولیو مہم میں حصہ لینے والی پولیو ٹیم کو گن پوائنٹ پر دھمکیاں، کوٹ سونڈکی میں پولیو ٹیم کے ایریا انچارج سید توصیف حیدر نے ای ڈی او ہیلتھ اٹک اور اسسٹنٹ کمشنر تحصیل حسن ابدال کو تحریری درخواست دیتے ہوئے بتایا کہ وہ پولیو مہم کے سلسلہ میں کوٹ سونڈکی کے علاقے کٹاریاں میرا پر پولیو ٹیم کو چیک کرنے اور اس علاقے میں پولیو کے قطرے پلوانے گیا تو راستے میں 2 نا معلوم افراد نے اسلحہ کے زور پر روک لیا اور جان سے مارنے کی دھمکی دیتے ہوئے کہا کہ آج ہم آپ کو چھوڑ رہے ہیں مگر آئندہ اس علاقے کا رخ کیا تو آپ کو جان سے مار دیں گے۔