گوجرانوالہ+ سادھوکے + جنڈیالہ شیر خان(نامہ نگاران) ٹریکٹر ٹرالی اور موٹر سائیکل کے تصادم میں ماں، بیٹی جاں بحق جبکہ دیور شدید زخمی ہوگیا۔ بتایا گیا ہے کہ لوہیانوالہ کا رہائشی نادر اپنی بھابھی بتول اور بھتیجی فرزانہ کے ساتھ موٹر سائیکل پر جا رہا تھا کہ پنڈی بائی پاس کے قریب انکی موٹر سائیکل تیزرفتار ٹریکٹر ٹرالی سے ٹکرا گئی جس کے نتیجے میں بتول اور فرزانہ جاں بحق جبکہ نادر شدید زخمی ہوگیا۔ سادھوکے میں تیز رفتار مسافر ویگن کا ٹائرپھٹنے سے الٹ جانے کے باعث موٹرسائیکل سوار میاں بیوی زد میں آکر جاںبحق جب کہ ویگن میں سوار خاتون سمیت دس افراد شدید زخمی ہو گئے۔ بتایا گیا ہے مسافر ویگن لاہور سے گوجرانوالہ جارہی تھی موضع گھنیاں کے نزدیک ٹائر پھٹنے سے توازن برقرار نہ رکھتے ہوئے لڑکھڑاکر الٹ گئی جس کی زد میں آ کر موٹرسائیکل سوار محسن اور اسکی اہلیہ نورینا سکنہ گلی نمبر 3نوشہرہ روڈ گوجرانوالہ بری طرح کچلے گئے، 25سالہ محسن شدید زخموں کی تاب نہ لاتے ہوئے موقع پر ہی دم توڑ گیا تاہم اسکی بیوی نورینا بی بی نے جائے حادثہ پر پون گھنٹہ تک طبی امداد نہ ملنے کے باعث تڑپ تڑپ کر جان دیدی۔ بروقت اطلاع کے باوجود ریسکیو عملہ تقریباپون گھنٹہ تاخیر سے پہنچا جبکہ جائے حادثہ پر موجود موٹروے پولیس کی موبائل گاڑی میں موجود افسران ہسپتال پہنچانے کی بجائے ریسکیو عملہ کا انتظار کرتے رہے۔پولیس کی گاڑی حادثہ پر دو گھنٹے کی تاخیر سے پہنچی ،جنہوں نے نعشوں کو پوسٹ مارٹم کیلئے ٹی ایچ کیو ہسپتال کامونکے  پہنچا دیا۔ حادثہ کے نتیجہ میں ویگن میں سوار حاجی پیر محمد، ثوبیہ بی بی، مختار، فاروق، دس سالہ سنی وغیرہ زخمیوں کو مریدکے اور گوجرانوالہ ہسپتالوں میں پہنچا دیا گیا جن میں سے بعض کی حالت تشویش ناک بتائی جاتی ہے حادثہ کے بعد ویگن ڈرائیور اور کنڈیکٹر موقع سے فرار ہو گئے۔