3 خودکشیاں: گوجرانوالہ میں پسند کی شادی نہ ہونے پر نوجوان نے زندگی ختم کر لی
گوجرانوالہ+ ڈسکہ+ پیرمحل (نمائندہ خصوصی+ نامہ نگاران) گوجرانوالہ، ڈسکہ اور پیرمحل میں 3 افراد نے زندگی ختم کر لی۔ تفصیلات کے مطابق گوجرانوالہ میں پسند کی شادی میں گھر والوں کی رکاوٹ پر نوجوان پھندے سے جھول گیا۔ بتایا گیا ہے سوئی گیس روڈ کا پچیس سالہ موٹر سائیکل مکینک کاشف اپنی مرضی کی شادی کرنا چاہتا تھا جبکہ اس کے اہلخانہ مان نہیں رہے تھے کہ گزشتہ روز کاشف اپنے کمرے میں بند ہو گیا اور پنکھے سے رسہ باندھ کر پھانسی لے لی۔ ڈسکہ میں بیماری سے تنگ نوجوان نے گلے میں پھندا ڈال کر زندگی ختم کر لی۔ متوفی کی بیوی مسرت بی بی نے بتایا متوفی فاروق احمد عرصہ سے بیمار تھا۔ ادھر پیر محل کے گائوں 741 گ ب میں مبینہ گھریلو جھگڑوں سے دلبرداشتہ ہو کر ادھیڑ عمر محمد نصیر ولد گاڑا خاں نے گھر کے باہر کھڑے درخت سے رسی باندھ کر گلے میں پھندا لے کر زندگی کا خاتمہ کر لیا۔
