مقبوضہ کشمیر : بھارتی مظالم کے خلاف بارہمولہ ، پلہالن میں مظاہرے ‘ جھڑپیں ‘ کئی اہلکار زخمی
سرینگر(کے پی آئی)بارہمولہ اورپلہالن پٹن میں بھارتی مظالم کے خلاف مظاہرے ہوئے، مظاہرین اور پولیس کے درمیان جھڑپوں میں پولیس کے ایک سب انسپکٹر سمیت کئی ا ہلکار زخمی ہو گئے۔ قصبہ میں دوپہر تک حالات مجموعی طور پر پرسکون رہے تاہم نوجوانوں کی ٹولیاں خانپورہ پل پر نمودار ہوئیں اور اسلام و آزادی کے حق میں نعرے بازی شروع کی ۔اسی دوران فوج کی بھاری نفری وہاں پہنچ گئی اور لاٹھی چارج کیا اور آنسو گیس کے گولے فائر کئے۔ فوج کے مطابق پتھرائو کے دوران ایک سب انسپکٹر سمیت متعدد اہلکار زخمی ہو گئے جنہیں ہسپتال منتقل کیا گیا۔ ادھر پلہالن پٹن میں بھی اسی طرح کی صورتحال پیش آئی۔ لوگوں کی ایک بڑی تعداد نے جلوس نکالا اور سرینگر مظفر آباد شاہراہ تک مارچ کیا ۔
