ٹانک اور مردان میں بارات کی گاڑیوں پر فائرنگ، 3 افراد جاں بحق‘ دولہا سمیت 5 زخمی
مردان‘ ٹانک (آئی این پی) تھانہ ہوتی کے قریب نامعلوم موٹر سائیکل سوار ملزموں نے شادی سے واپس آنیوالے ایک ہی خاندان کے 5 افراد پر فائرنگ کر دی جس سے ایک شخص ہلاک اور دو بچے اور ایک نوجوان زخمی ہوگئے۔ گومل میں باراتیوں کی گاڑی پر نامعلوم افراد کی فائرنگ کے نتیجے میں دو افراد جاں بحق جبکہ دولہا سمیت تین افراد زخمی ہو گئے۔ تھانہ گومل پولیس کے مطابق ہفتہ کی رات ٹانک کے گائوں گومل میں فیاض نامی شخص کی شادی کی تقریب تھی۔ شادی کی تقریب میں شریک باراتی دولہا کے ہمراہ واپس جا رہے تھے کہ گومل کے علاقہ میں زیرتعمیر کالج کے قریب پہلے سے گھات لگائے نامعلوم افراد نے ان پر فائرنگ کر دی جس کی زد میں آ کر ظفر علی اور لیاقت نامی دو افراد جاں بحق ہو گئے جبکہ گاڑی میں سوار دولہا فیاض اور اس کے چچا زاد بھائی وسیم اور رحمت اللہ زخمی ہو گئے۔
